Энди маҳкумларнинг китоб мутолааси тест орқали баҳоланади
Адабиётларни ўқиганлик даражасини баҳолаш учун махсус комиссия ташкил этилиб, комиссия йилига камида икки марта тест синовлари натижаларини кўриб чиқади.
Ҳукуматнинг 2026 йил 12 июндаги 307-сон қарори билан жазони ижро этиш муассасаларида маҳкумларнинг маънавий-ахлоқий қадриятларни шакллантиришга қаратилган адабиётларни ўқиганлик фактини тасдиқлаш бўйича комиссия фаолиятини ташкил этиш тартиби тасдиқланди. Бу ҳақда Адлия вазирлиги хабар берди.
Янги низомга кўра, маҳкумларнинг адабиётларни ўзлаштирганлик даражасини аниқлаш, тест синовлари жараёнини назорат қилиш ва натижаларни тасдиқлаш мақсадида муассаса ходимлари ҳамда жамоатчилик вакилларидан иборат комиссия тузилади.
Комиссия йиғилишлари йилига камида икки маротаба — феврал ва август ойларида ўтказилади. Тест натижалари бўйича тайёрланган хулоса маҳкумга имзо эвазига таништирилади ва унинг шахсий йиғмажилдига киритилади.
Шунингдек, комиссия хулосасининг нусхаси прокурорга юборилади. Маҳкумнинг ҳимоячиси эса ўз сўровига кўра ушбу ҳужжат нусхасини олиши мумкин.
Низомга мувофиқ, маҳкум тест натижалари билан таништирилган кундан бошлаб 5 иш куни ичида тест ўтказиш жараёни ёки унинг натижалари юзасидан шахсан ўзи ёки ҳимоячиси орқали судга шикоят қилиш ҳуқуқига эга.
Суд шикоятни кўриб чиқиб, далиллар тасдиқланмаса тест натижаларини ўз кучида қолдириши, далиллар асосли деб топилган тақдирда эса тест натижаларини бекор қилиш тўғрисида қарор қабул қилиши мумкин.
