2025 йилги ОТМ битирувчиларининг ўртача ойлик иш ҳақи 5,1 миллион сўмни қайд этди

 
Президент Шавкат Мирзиёевга тақдим этилган таълим тизимини ривожлантиришга оид тақдимотда олийгоҳлари фаолияти самарадорлигини баҳолашнинг замонавий механизми — Битирувчилар сифат индексини жорий этиш бўйича муҳим қарорлар белгилаб олинди.

 
Эндиликда Ўзбекистонда олий таълим муассасалари фаолиятини баҳолашнинг янги механизми — Битирувчилар сифат индекси жорий этилмоқда. Мазкур индекс нафақат битирувчиларнинг ишга жойлашганлигини, балки уларнинг меҳнат бозоридаги муваффақияти ва касбий фаолияти сифатини ҳам баҳолаш имконини беради.

 

Ушбу индекс бўйича дастлабки моделлаштириш амалга оширилди. Моделлаштириш 114 та олий таълим ташкилотининг 2025 йилдаги 242,6 минг нафар битирувчиси ҳақидаги маълумотлар асосида амалга оширилди.

 

Дастлабки натижаларга кўра битирувчиларнинг бандлик даражаси — 75%, ўртача ойлик иш ҳақи — 5,1 млн сўм, ўртача ишга жойлашиш муддати — 2 ой 1 кун ва битирувчиларнинг 60,1% қисми камида 4 ой давомида барқарор ишлаган. Бу ҳақда Таълим сифатини таъминлаш Миллий агентлиги Матбуот хизмати хабар берди. 

 

Қизиқарли жиҳати шундаки, энг юқори ўртача иш ҳақи Бизнес ва бошқарув (8,5 млн сўм), Ҳуқуқ (7,3 млн сўм) ҳамда АКТ (6,8 млн сўм) йўналишлари битирувчиларида кузатилмоқда.

 

Энг юқори индекс эса Математика ва статистика (69,6 балл), Таълим (66,7 балл) ҳамда Бизнес ва бошқарув (63,9 балл) йўналишларида қайд этилган.

 

Индекс натижаларига кўра энг яхши кўрсаткичларга эга бўлган Топ-20 олийгоҳнинг Карера марказлари 500 млн сўмдан рағбатлантирилади.

 

Ушбу натижалар 8 ойлик кузатув даври асосидаги дастлабки моделлаштириш ҳисобланади. Индекснинг якуний натижалари 12 ойлик маълумотлар асосида ҳисобланиб, жорий йил август ойида эълон қилинади.