2035 йилгача иссиқхона газлари чиқиндиларини 50 фоизга камайтириш режалаштирилмоқда
Ўзбекистон делегацияси Бонндаги FMCP3 сессиясида миллий иқлим мажбуриятлари бўйича эришилган натижаларни тақдим этди.
Германиянинг Бонн шаҳрида бўлиб ўтган Тараққиётни кўп томонлама кўриб чиқиш бўйича ишчи гуруҳнинг учинчи сессияси (FMCP3)да Ўзбекистон делегацияси мамлакатда иқлим ўзгаришига қарши кураш ва миллий иқлим мажбуриятларини амалга ошириш бўйича эришилган натижаларни тақдим этди.
Миллий иқлим маркази директори Фаррух Сатторов бошчилигидаги делегация БМТнинг Иқлим ўзгариши бўйича Ҳадли Конвенцияси доирасидаги Ёрдамчи органларнинг 64-сессияси (SB64) тадбирларида иштирок этди.
Сессияда Ўзбекистонда қайта тикланувчи энергия манбаларини ривожлантириш, энергия самарадорлигини ошириш, иқтисодиётнинг иқлим хавфларига чидамлилигини мустаҳкамлаш ҳамда Париж келишуви доирасидаги мажбуриятларни бажариш бўйича амалга оширилаётган ислоҳотлар ҳақида маълумот берилди.
Таъкидланишича, янгиланган Миллий миқёсда белгиланган ҳисса (NDС) дастурига мувофиқ, Ўзбекистон 2035 йилгача 2010 йилга нисбатан ЯИМ бирлигига тўғри келадиган иссиқхона газлари чиқиндиларини 50 фоизга камайтиришни мақсад қилган. Шунингдек, иқтисодиётнинг углерод сиғимини 35 фоизга камайтириш бўйича олдинги мақсад муддатидан аввал бажарилган.
Сессия давомида мамлакатда қуёш ва шамол энергетикаси лойиҳалари ҳисобига электр энергияси ишлаб чиқариш қувватларида «яшил» энергия улуши қарийб 30 фоизга етгани, 2030 йилгача эса бу кўрсаткични 50 фоиздан ошириш режалаштирилаётгани қайд этилди.
Сув ресурсларини тежаш борасидаги ишлар ҳам алоҳида эътироф этилди. Сувни тежовчи технологияларни кенг жорий этиш натижасида ҳар йили қарийб 10 миллиард куб метр сув иқтисод қилинаётгани маълум қилинди.
Ўзбекистон делегацияси мамлакат бундан буён ҳам халқаро иқлим ҳамкорлигини кенгайтириш, иқлим молиялаштиришини жалб этиш ва замонавий технологияларни жорий этиш орқали Париж келишуви мақсадларига эришиш йўлида фаол ишлашини таъкидлади.
