ТХИФ-2026 доирасида халқаро саноат кўргазмаси ўз ишини бошлади

 

Тошкент халқаро инвестиция форуми (ТХИФ-2026) доирасида CAEx кўргазма мажмуасида Ўзбекистоннинг инвестициявий, ишлаб чиқариш ва экспорт салоҳиятини намойиш этишга қаратилган йирик халқаро саноат кўргазмаси ўз ишини бошлади. Бу ҳақда «Дунё» АА хабар берди.

 

Кўргазма форумнинг марказий тадбирларидан бирига айланиб, мамлакатнинг етакчи компаниялари, тармоқ бирлашмалари, давлат идоралари ҳамда хорижий ҳамкорларни бир майдонга жамлаган. Қарийб 6 минг квадрат метр майдонда Ўзбекистон иқтисодиётининг асосий тармоқларидаги инвестиция лойиҳалари ва истиқболли ишлаб чиқариш ташаббуслари тақдим этилмоқда.

 

Экспозицияда нефть-газ-кимё саноати, машинасозлик, электротехника, қурилиш материаллари, металлургия, фармацевтика, озиқ-овқат саноати ва бошқа йўналишлардаги ютуқлар намойиш этилмоқда. Шунингдек, ишлаб чиқаришни маҳаллийлаштириш, экспорт салоҳиятини кенгайтириш ва янги иш ўринларини яратишга қаратилган лойиҳаларга алоҳида эътибор қаратилган.

 

Кўргазма бизнес вакиллари, халқаро молия институтлари ва давлат органлари ўртасида тўғридан-тўғри мулоқот майдони сифатида ҳам хизмат қилмоқда. Тадбир давомида қўшма лойиҳалар, инвестиция имкониятлари ва халқаро ҳамкорликни кенгайтириш масалалари муҳокама этилмоқда.

 

Форум дастурида панель муҳокамалари, тармоқ ва ҳудудий форумлар, инвестиция лойиҳалари тақдимотлари, питч-сессиялар ҳамда B2B ва G2B учрашувлари ўрин олган. Тадбир якунида янги келишувлар ва шартномалар имзоланиши кутилмоқда.

 

Маълумотларга кўра, ТХИФ-2026да 100 дан ортиқ мамлакатдан 9 мингдан зиёд делегат, жумладан, халқаро ташкилотлар ва йирик компаниялар вакиллари иштирок этмоқда.