Ўзбекистон Биринчи хоними ва Албания Биринчи хоними учрашди
Арманда Бегай Кўксаройдаги учрашув доирасида ўзбек халқининг миллий санъати, урф-одатлари ҳамда “Келин салом” маросими билан танишди.
Албания Республикаси Президенти Бажрам Бегажнинг Ўзбекистонга расмий ташрифи доирасида Кўксарой қароргоҳида Ўзбекистон Биринчи хоними Зироат Мирзиёева ҳамда Албания Биринчи хоними Арманда Бегажнинг учрашуви бўлиб ўтди.
Очиқ ва самимий руҳда ўтган мулоқот чоғида томонлар Ўзбекистон ва Албания халқлари ўртасидаги дўстлик ҳамда ўзаро англашувни мустаҳкамлаш, маданий-гуманитар ҳамкорликни кенгайтириш масалаларини муҳокама қилди.
Маданий дастур давомида Арманда Бегай ўзбек амалий санъати усталарининг ишлари, жумладан ёғоч ўймакорлиги, қадимий сўзана каштачилиги ва анъанавий кулолчилик буюмлари билан танишди.
Шунингдек, анъанавий ўзбек либослари намойиши ҳамда мамлакатнинг турли ҳудудларига хос хусусиятларни акс эттирувчи “Келин салом” маросими тақдимоти бўлди.
Албания Биринчи хоними ўзбек халқининг миллий анъана ва урф-одатларига қизиқиш билдириб, уларнинг чуқур тарихий илдизлари, гўзаллиги ва бетакрорлигини алоҳида эътироф этди.
