Ўзбекистонда 94 турдаги товар бозорида маҳаллий маҳсулотлар улуши паст — Рақобат қўмитаси
Ўрганилган 105 та бозорнинг 55 тасида тўйинганлик даражаси паст эканлиги аниқланди.
Рақобат қўмитаси томонидан ўтказилган таҳлиллар натижасида Ўзбекистондаги 94 турдаги товар бозорида маҳаллий маҳсулотлар улуши белгиланган кўрсаткичлардан паст экани аниқланди. Бу ҳақда Тошкент халқаро инвестиция форуми доирасида маълум қилинди.
Қўмита ҳузуридаги Рақобат сиёсати ва истеъмолчилар ҳуқуқлари тадқиқотлари маркази маълумотларига кўра, 2025 йил ҳамда 2026 йилнинг дастлабки ойларида ўтказилган ўрганишлар давомида қатор бозорларда маҳаллий ишлаб чиқариш ички талабни тўлиқ қоплай олмаётгани қайд этилган.
Шунингдек, 2026 йил январь–февраль ойларида ички бозорда рақобат муҳити етарлича шаклланмаган ва талаб тўлиқ қондирилмаган 20 турдаги маҳсулот бўйича алоҳида таҳлиллар амалга оширилган.
Эркин иқтисодий зоналардан келиб тушган мурожаатлар асосида ўрганилган 105 та товар бозорининг 55 тасида эса тўйинганлик даражаси паст эканлиги аниқланган.
Мутахассислар фикрича, мазкур кўрсаткичлар айрим соҳаларда ишлаб чиқариш ҳажмларини ошириш, импорт ўрнини босувчи маҳсулотлар ишлаб чиқаришни йўлга қўйиш ва янги инвестиция лойиҳаларини амалга ошириш учун қўшимча имкониятлар мавжудлигини кўрсатади.
