Агар меморандум ёқмаса, Эрон яна зарба остида қолади — Трамп
АҚШ президенти Эрон билан келишув якуний эмаслигини ва ҳарбий жавоб эҳтимоли сақланиб қолишини билдирди.
АҚШ президенти Дональд Трамп Францияда бўлиб ўтган G7 саммити доирасида агар Эрон билан тузилган ўзаро англашув меморандуми шартлари унга маъқул келмаса, АҚШ ҳарбий ҳаракатларни қайта бошлаши мумкинлигини маълум қилди.
Трампнинг сўзларига кўра, мазкур ҳужжат якуний келишув эмас ва унинг бажарилиши қатъий шартларга боғлиқ. У, шунингдек, меморандум доирасида Эрон билан санкцияларни бекор қилиш дарҳол амалга ошмаслигини таъкидлаган.
“Бу ўзаро англашув меморандуми. Агар менга ёқмаса, биз яна зарба беришга қайтамиз”, — дея унинг сўзларидан иқтибос келтиради Reuters.
АҚШ президенти Эрон билан келишув жараёни ҳали якунига етмаганини қайд этиб, музокаралар давом этаётганини билдирган. Шунингдек, айрим оммавий ахборот воситаларида Эрон учун катта миқдордаги инвестиция жамғармаси ташкил этилгани ҳақидаги хабарларни рад этган.
Аввалроқ Трамп Эроннинг ядровий дастури бўйича қатъий огоҳлантиришлар бериб, Теҳрон ҳеч қачон ядровий қуролга эга бўлмаслигини таъкидлаган эди.
