АҚШ Исроилга Эрон билан имзоланган меморандум матнини тақдим этмади
Нетаняху Эрон билан эришилган келишувнинг аниқ тафсилотлари Исроилга ҳали маълум эмаслигини билдирди.
АҚШ маъмурияти Исроилнинг Эрон билан эришилган ўзаро англашув меморандуми матнини тақдим этиш ҳақидаги сўровини рад этди. Бу ҳақда CNN телеканали Исроилдаги манбаига таяниб хабар берди.
Манбага кўра, Вашингтоннинг асосий хавотирларидан бири меморандум мазмуни расмий эълон қилинишидан аввал Исроил Бош вазири Биньямин Нетаняху томонидан ошкор этилиши эҳтимоли билан боғлиқ.
Мазкур маълумотни биринчи бўлиб Исроилнинг i24 News телеканали эълон қилган. Шу билан бирга, АҚШ расмийларидан бири ушбу хабарни рад этиб, Вашингтон музокаралар жараёнида минтақадаги шериклари, жумладан, Исроил билан яқин ҳамкорлик қилаётганини таъкидлаган.
Душанба куни матбуот анжумани ўтказган Исроил Бош вазири Биньямин Нетаняху Эрон билан меморандум масаласига деярли тўхталмаган. Кейинчалик журналистлар саволларига жавоб берар экан, у АҚШ президенти Дональд Трамп билан барча масалаларда ҳам фикрлари бир хил эмаслигини қайд этган.
“Биз ҳали ҳам ушбу келишувнинг аниқ мазмуни қандай бўлишини билмаймиз”, — деган Нетаняху.
Аввалроқ Дональд Трамп Эрон билан имзоланган ўзаро англашув меморандуми тафсилотлари яқин кунларда жамоатчиликка маълум қилинишини билдирган эди.
