Болгарияда қийин вазиятга тушиб қолган 6 нафар ўзбекистонлик ватанга қайтарилди
Тегишли идоралар хорижда иш излаётган фуқароларни фақат расмий манбалар орқали ишга жойлашишга ва меҳнат шартномаларини қонуний расмийлаштиришга чақирди.
Болгария Республикасида мураккаб моддий ва ижтимоий вазиятга тушиб қолган 6 нафар Ўзбекистон фуқароси ватанга қайтарилди. Бу ҳақда Истанбул шаҳридаги Ўзбекистон Бош консулхонаси хабар берди.
Маълум қилинишича, фуқароларни қайтариш бўйича зарур консуллик-ҳуқуқий ва ташкилий чоралар кўрилган. Натижада улар 16 июнь куни Ўзбекистонга беғараз асосда қайтарилиб, оила аъзолари бағрига соғ-саломат етиб боришган.
Тегишли идоралар хорижга ишлаш мақсадида чиқаётган фуқароларни иш берувчи ва воситачи ташкилотлар ҳақидаги маълумотларни олдиндан синчиклаб ўрганиш, меҳнат шартномаларини қонунчилик асосида расмийлаштириш ҳамда фақат расмий ва ишончли манбалар орқали ишга жойлашишга чақирди.
Таъкидланишича, шубҳали таклифларга ишониш ва ҳужжатларсиз хорижга чиқиш фуқароларни мураккаб ҳуқуқий ва ижтимоий муаммоларга дучор қилиши мумкин.
