Ўзбекистонда 1-синфга қабул тизими онлайн шаклга ўтказилади
Жорий йилда 5 690 та мактабда биринчи синфга қабул онлайн шаклда амалга оширилади.
2026–2027 ўқув йили учун Ўзбекистонда биринчи синфга қабул жараёнлари босқичма-босқич рақамлаштирилмоқда. Жорий йилда мамлакатнинг 135 та туман ва шаҳридаги 5 690 та умумтаълим мактабида 1-синфга қабул онлайн шаклда амалга оширилади.
Мактабгача ва мактаб таълими вазирлиги маълумотига кўра, бу республикадаги барча умумтаълим муассасаларининг қарийб 60 фоизини ташкил этади.
Шунингдек, Тошкент шаҳри ва Бухоро вилоятида 2026–2027 ўқув йили учун биринчи синфга қабул жараёни тўлиқ онлайн форматга ўтказилди. Энди ушбу ҳудудлардаги ота-оналар ариза топшириш учун мактабларга шахсан мурожаат қилишлари шарт бўлмайди.
Вазирлик маълумотига кўра, 2026–2027 ўқув йили учун 1-синфга қабул жараёнлари 20 июндан бошланади.
