Ангренда 344 марта қоида бузган Spark топилди
Ҳайдовчининг жаримаси 175 млн сўмдан ортиб кетган.
Мажбурий ижро бюроси Тошкент вилояти бошқармаси қидирув ходимлари томонидан қидирувда бўлган автомашиналарни аниқлаш ишлари жараёнида бир ҳайдовчига тегишли «Spark» русумли автомашина топилди.
Маълум бўлишича, ушбу транспорт воситаси билан 344 марта йўл ҳаракати қоидалари бузилган ва 175 млн сўмдан ортиқ жарималар белгиланган бўлган.
Энг қизиғи, кўплаб қоидабузарликлар учун ҳисобланган жарималар ўз вақтида тўланмагани сабабли ижро ҳужжатлари юритувга олинган. Бироқ автомашина узоқ вақт давомида топилмай келган.
Олиб борилган қидирув тадбирлари натижасида транспорт воситаси Ангрен шаҳар ҳудудида аниқланган.
Жарималарни ўз вақтида тўлаш ва йўл ҳаракати қоидаларига риоя қилиш нафақат қонун талабидир, балки ҳайдовчининг хавфсизлиги ва мол-мулкини сақлаб қолиш учун ҳам муҳим ҳисобланади.
Қайд этилишича, энди ундирув ишларига киришилади, чунки машина топилди ва уни аукционга қўйиш чоралари кўрилади.
