Фарғонада солиқ қарзи сабаб машиналар хатланмоқда
Хатлов жараёнларидан бирида транспортдан айрилишни истамаган МЧЖ раҳбари шу куниёқ 67 миллион сўмдан ортиқ қарзни тўлаган.
Мажбурий ижро бюросининг Учкўприк туман бўлими иш юритувига қарздор “H. R.” МЧЖдан ундирувчи туман Давлат солиқ инспекцияси фойдасига 2026 йил 19 майдаги қарорларга асосан 2 та ижро ҳужжати келиб тушиб, шу куннинг ўзида ижро иши қўзғатилган.
Бўлим давлат ижрочилари томонидан олиб борилган ижро ҳаракатлари давомида қарздор корхонага тегишли бўлган икки дона “Isuzu” русумли юк автотранспорт воситалари қидирувга берилди.
Олиб борилган қидирув тадбирлари натижасида мазкур транспорт воситаларидан бири Қўқон шаҳри ҳудудида, иккинчиси эса Учкўприк туманида аниқланиб, белгиланган тартибда хатланган.
Автотранспорт воситаларидан айрилишни истамаган МЧЖ раҳбари давлат ижрочилари томонидан олиб борилган тушунтириш ишларидан сўнг шу куннинг ўзида қарздорликни тўлиқ бартараф этди.
Натижада ундирувчи фойдасига 63 миллион қарздорлик, шунингдек 3 миллион 191 минг 40 сўм ижро йиғими ундирилиб, жами 67 миллион сўмдан ортиқ маблағнинг ижроси амалда таъминланган.
