Хорижий инвесторлар кенгаши аъзолари сони 85 тага етди
Хорижий инвесторлар кенгаши Янги Ўзбекистон ва жаҳон бизнеси ўртасидаги ишончли платформага айланди.
Шавкат Мирзиёев раислигида Хорижий инвесторлар кенгашининг навбатдаги йиғилиши бошланди. Давлат раҳбари тадбир аввалида Европа тикланиш ва тараққиёт банки президенти Одил Рено-Бассога Ўзбекистонда амалга оширилаётган ислоҳотларни изчил қўллаб-қувватлаб келаётгани ҳамда кенгаш фаолиятига самарали раислик қилаётгани учун миннатдорлик билдирди.
Таъкидланганидек, сўнгги йилларда Хорижий инвесторлар кенгаши оддий маслаҳат механизмидан амалий ислоҳотлар майдонига, Янги Ўзбекистон билан жаҳон инвестиция ҳамжамияти ўртасидаги ишончли кўприкка айланди. Бугунги кунда кенгаш мустақил ассоциация мақомига эга бўлиб, том маънода кучли институт даражасига кўтарилди.
Ўтган бир йил давомида кенгаш аъзолари сони 54 та компаниядан 85 тага етди. Улар иқтисодиётнинг 23 та тармоғини қамраб олган ҳолда ишчи гуруҳлар фаолиятида бевосита иштирок этмоқда. Европа тикланиш ва тараққиёт банки, Осиё тараққиёт банки ҳамда Халқаро молия корпорацияси кенгашнинг Ижроия қўмитаси таркибида фаолият юритмоқда.
Президент Шавкат Мирзиёев инвесторлар фаоллиги тобора ортиб бораётганини алоҳида қайд этиб, бу мазкур платформага бўлган юксак ишончнинг яққол ифодаси эканини таъкидлади.
Давлат раҳбари ўтган йилги мажлисда илгари сурилган 21 та ташаббус бўйича аниқ ечимлар қабул қилинганини билдириб, инвесторлар томонидан берилган таклифлар давлат сиёсатида амалий ифодасини топаётганини қайд этди.
Хусусан, Солиқ кодексига инвесторлар учун қулай ўзгартиришлар киритилди, компаниялар ўртасидаги ички қарз битимлари молиявий назоратдан чиқарилди, асосий воситаларни тезлаштирилган тартибда амортизация қилиш ҳуқуқи берилди. Шунингдек, халқаро стандартлар асосида ҳисобот юритувчи хорижий компаниялар учун қатор мажбурий талаблар бекор қилинди.
Бундан ташқари, “Муқобил инвестиция жамғармалари тўғрисида”ги қонун лойиҳаси ишлаб чиқилди. Масъулиятли бизнес юритиш стандартларини жорий этиш ҳамда 16 та техник регламентни халқаро меъёрларга мослаштириш бўйича дастур тайёрланди.
Шу билан бирга, хорижий инвесторлар учун тенг ва адолатли шароитларни таъминлашга қаратилган халқаро мажбуриятларни қабул қилиш борасида ҳам янги қадамлар ташлангани таъкидланди.
