Самарқандда солиқ қарздорлиги учун 2 та Volkswagen хатланди
Маълум бўлишича, қарздорлик миқдори 150 млн сўмдан ортиқ бўлган.
Мажбурий ижро бюроси Пайариқ туман бўлими томонидан солиқ қарздорлигини ундиришга қаратилган ижро ҳаракатлари давомида бир кунда икки нафар қарздорга тегишли автотранспорт воситалари хатланиб, жарима майдончасига жойлаштирилди.
"V-a SHB" ф/х балансида бўлган Volkswagen русумли автотранспорт воситаси солиқ қарздорлиги бўйича чиқарилган қарор ижросини таъминлаш мақсадида хатланди. Мазкур қарздорликка доир 10 дан ортиқ ижро ҳужжатлари мавжуд бўлиб, қарздорлик миқдори 112 миллион сўмни ташкил этади.
Шунингдек, Қ-в Д-д ф/х балансидаги Volkswagen русумли автомашина ҳам солиқ қарздорлиги сабабли жарима майдончасига қўйилди. Қарздорга нисбатан 20 та ижро ҳужжати мавжуд бўлиб, қарздорлик суммаси 130 миллион сўмдан ортиқ.
Автотранспорт воситалари солиқ органларининг солиқ қарздорлигини ундириш тўғрисидаги қарорлари асосида Мажбурий ижро бюроси Пайариқ туман бўлими давлат ижрочилари томонидан хатланди ва сақлаш учун жарима майдончасига жойлаштирилди.
Қарздорлик муддатда қопланмаса, хатланган автомашиналар аукцион савдосида сотилиб, тушган маблағ қарздорликни қоплашга йўналтирилади.
