Тошкент халқаро молия маркази тўғрисидаги Конституциявий қонун қабул қилинади
Ўзбекистон Иқтисодий ҳамкорлик ва тараққиёт ташкилотининг Халқаро инвестициялар ва кўп миллатли корхоналар тўғрисидаги декларациясига қўшилди.
Хорижий инвесторлар кенгашининг навбатдаги йиғилишида Президент Шавкат Мирзиёев Ўзбекистоннинг Иқтисодий ҳамкорлик ва тараққиёт ташкилотининг Халқаро инвестициялар ва кўп миллатли корхоналар тўғрисидаги декларациясига қўшилгани яқинда эълон қилинганини қайд этди.
Давлат раҳбарининг таъкидлашича, мазкур йўналишдаги ишларнинг мантиқий давоми сифатида Тошкент халқаро молия маркази тўғрисидаги Конституциявий қонун қабул қилиниши кутилмоқда.
“Буларнинг барчаси ғояларингиз амалиётда изчил татбиқ этилаётганининг ёрқин далилидир”, — деди Президент.
Қайд этилганидек, ўтган давр мобайнида кенгаш ҳузуридаги ишчи гуруҳлар томонидан инвесторлар манфаатларига хизмат қилувчи 50 дан ортиқ самарали учрашув ташкил этилган. Улар доирасида муқобил инвестиция жамғармалари, гаров қонунчилиги, масъулиятли бизнес юритиш, профессионал кадрлар тайёрлаш, солиқ маъмурчилиги, ер ажратиш ва энергетика каби устувор йўналишлар хорижий инвесторлар билан ҳамкорликда батафсил муҳокама қилинган.
Жорий йиғилишга тайёргарлик жараёнида 120 та янги таклиф ва ташаббус келиб тушган. Улар чуқур таҳлил қилиниб, инвестиция муҳитини такомиллаштириш, солиқ тизими, кадастр, энергетика, молия ва банк тизими, корпоратив бошқарув, сунъий интеллект ҳамда рақамли иқтисодиёт каби еттита устувор йўналишга бирлаштирилди.
Президент айниқса валюта операциялари бўйича мониторинг жараёнларини соддалаштириш, исломий суғурта тизимини жорий этиш, «яшил» кредитлар ва банк активлари бозорини ривожлантириш, шунингдек, корхоналарда экологик, ижтимоий масъулият ва самарали бошқарувни назарда тутувчи ESG тамойилларини кенг қўллаш масалалари бугунги кунда алоҳида аҳамият касб этаётганини таъкидлади.
Шу муносабат билан ҳар бир йўналиш бўйича масъуллар белгиланиб, аниқ ечимлар ишлаб чиқилиши қайд этилди.
Давлат раҳбари ушбу муҳим вазифаларни амалга оширишда фаол иштирок этаётган ишчи гуруҳлар ҳамраислари — “Vision Invest”, “BDO”, “Crowe”, “OTP Group”, “Franklin Templeton”, “Ernst & Young”, “Costa Legal” ва “ACWA Power” компаниялари раҳбарларига миннатдорлик билдирди.
