Туркиялик инвесторлар Имом Бухорий бошқарувига қизиқиш билдирмоқда — Жамшид Қўчқоров
Туркиялик инвесторлар Ўзбекистонда туризм инфратузилмасини ривожлантириш ва янги сайёҳларни жалб этиш бўйича стратегик ҳамкор бўлишга таклиф этилди.
Туркиялик инвесторлар Самарқандда жойлашган Имом ал-Бухорий мажмуасини бошқаришга қизиқиш билдирмоқда. Бу ҳақда Иқтисодиёт ва молия вазири Жамшид Қўчқоров 16 июнь куни Ўзбекистон-Туркия бизнес форумида маълум қилди.
Бизнес учрашув Тошкент халқаро инвестициялар форуми доирасида ташкил этилган. “Daryo” нашрига кўра, Жамшид Қўчқоров ўз чиқишида туркиялик инвесторларни қатор соҳалар бўйича ҳамкорликка таклиф қилди. Қўчқоров Ўзбекистонда сайёҳлик йўналиши жадал ривожланаётганини таъкидлади.
Унга кўра, яқинда фойдаланишга топширилган Ислом цивилизацияси маркази, Имом Бухорий ва Имом Мотуридий мажмуалари зиёрат, маданий- маърифий туризм марказларига айланишига ишонч билдирилди.
“Ўзбекистон ва Туркия ўртасида туризм соҳасида катта салоҳият мавжуд. Биз туркиялик бизнес вакилларини сайёҳлик йўналишида қўшма маркетинг дастурларини амалга оширишга, меҳмонхона ва сервис инфратузилмасини ривожлантириш, Туркия ва учинчи давлатлардан сайёҳлар оқимини кўпайтириш бўйича стратегик ҳамкор бўлишга таклиф этамиз. Самарқанд шаҳрининг яқинида жойлашган Имом Бухорий зиёрат мажмуасини бошқарувга олиш масаласи юзасидан турк инвесторлари томонидан катта қизиқиш билдирилмоқда”, — деган вазир.
Мазкур форум доирасида 18 июнь куни туризмга бағишланган панель йиғилишидан сўнг Туризм қўмитаси раиси Абдулазиз Аққлуов журналистларга Имом Бухорий мажмуаси атрофидаги 24 та меҳмонхона хорижий инвесторларга ижарага берилаётганини маълум қилди.
Унинг айтишича, мазкур меҳмонхоналар 2 йилга инвесторларга ижарага берилади. 3 йилдан бошлаб ўзаро меҳмонхона эгалари билан биргаликда умумий маркетинг чораларни биргаликда кўриб чиқади.Аққулов ҳамкор томон мажбуриятларидан 24 та меҳмонхонага турли мусулмон давлатлардан меҳмонхона брендларини жалб қилиш ва уларни тарғиб қилиши кераклигини айтди.
Қўмита раиси , 15-16 июнь кунлари “Ратан” меҳмонхоналари мажмуаси раҳбари Тошкент ва Самарқандга келиб меҳмонхоналарни кўздан кечириб, баҳолаш жараёнларини ўтказиб кетишган. Июль ойида ўзларини инспекциялари билан текширув ишларини амалга оширишини маълум қилди.
Унга кўра, “Ратан” меҳмонхонаси вакиллари Ўзбекистондаги 2-3 та хусусий меҳмонхона вакиллари билан келишувга эришган.
