Қувасойда солиқ қарзи эвазига трактор хатланди
Қарздор мажбуриятни бажариш ўрнига тракторни боғ ҳудудига яшириб келгани маълум бўлди.

Мажбурий ижро бюроси Қувасой шаҳар бўлими иш юритувига келиб тушган ижро ҳужжатига асосан, солиқ органи фойдасига қарздор МЧЖдан 315 миллион сўм солиқ қарздорлигини ундириш белгиланган.
Бироқ қарздор корхона белгиланган муддатда қарзни ихтиёрий равишда тўламаган. Ижро ҳаракатлари давомида МЧЖга тегишли бўлган “Беларус” русумли тракторни қўшни қишлоқ ҳудудидаги боғга яшириб қўйгани аниқланди.
Давлат ижрочилари томонидан олиб борилган қидирув тадбирлари натижасида яширилган техника топилиб, “Беларус” русумли трактор хатланди ҳамда белгиланган тартибда сақловга олинди.
Ҳозирда 315 миллион сўмлик солиқ қарздорлигини ундириш юзасидан мажбурий ижро ҳаракатлари давом эттирилмоқда.








