Ўзбекистон минтақанинг бош инвестициявий марказига айланмоқда

 

V Тошкент халқаро инвестиция форуми ўз миқёси ва нуфузли иштирокчилари билан рекорд кўрсаткичларни қайд этди. Жорий йилги форумда 10 минг 600 нафардан ортиқ иштирокчи қатнашди. Уларнинг 4 мингдан зиёди дунёнинг 102 та давлатидан ташриф буюрган хорижий меҳмонлар, инвесторлар ва бизнес вакилларидан иборат бўлди.

 

Нуфузли анжуманда Германия Президенти Франк-Валтер Штайнмаер ва Албания Президенти Байрам Бегай, шунингдек, Россия, Беларус, Озарбайжон, Қозоғистон, Қирғизистон ҳамда Тожикистон ҳукумат раҳбарлари иштирок этди.

 

Форум доирасида Европа тикланиш ва тараққиёт банки, Жаҳон банки, Осиё тараққиёт банки, Осиё инфратузилма инвестициялари банки, Халқаро молия корпорацияси, Янги тараққиёт банки ҳамда бошқа йирик халқаро молия институтлари ва компаниялари вакиллари ҳам қатнашди.

 

Таъкидлаш жоизки, форум иштирокчилари Тошкентга ташрифини шахсий ташаббус асосида амалга оширди. Улар транспорт, меҳмонхона ва бошқа харажатларни мустақил равишда қоплаган ҳолда Ўзбекистонга ташриф буюрди. Бу эса мамлакатнинг инвестициявий жозибадорлиги, иқтисодий салоҳияти ва барқарор тараққиётига халқаро бизнес ҳамжамиятининг юксак ишончини намоён этмоқда.

 

Тошкент халқаро инвестиция форуми нафақат йирик капитални жалб қилиш, балки минтақавий ҳамкорликни мустаҳкамлаш, янги иқтисодий алоқаларни ривожлантириш ва халқаро мулоқот учун муҳим платформа сифатидаги аҳамиятини ҳам яна бир бор тасдиқлади.