Жаҳон банки вице-президенти Мирзо Улуғбек туманига ташриф буюрди
Ташриф Тошкент халқаро инвестиция форуми доирасида ташкил этилди.
Пойтахтда ўтказилаётган В Тошкент халқаро инвестиция форуми доирасида халқаро молия институтлари ва ташкилотлар вакиллари Ўзбекистонда амалга оширилаётган ислоҳотлар ҳамда ҳудудларнинг ижтимоий-иқтисодий ривожланиш жараёнлари билан яқиндан танишмоқда.
Шу муносабат билан 17 июнь куни Жаҳон банки вице-президенти Сангбу Ким бошчилигидаги делегация Мирзо Улуғбек туманига ташриф буюрди. Меҳмонларни Тошкент шаҳар ҳокими ўринбосари Алишер Дусмухамедов ҳамда Мирзо Улуғбек тумани ҳокими Боходир Гаибназаров кутиб олди.
Ташриф давомида меҳмонларга туман ҳокимлигининг фаолияти, замонавий бошқарув механизмлари, ҳудудни комплекс ривожлантириш бўйича амалга оширилаётган лойиҳалар ҳамда рақамли трансформация жараёнлари ҳақида батафсил маълумот берилди.
Хусусан, “Вазиятлар маркази” фаолияти, унинг реал вақт режимида муаммоларни аниқлаш ва тезкор ҳал этишдаги ўрни алоҳида тақдим этилди.
Халқаро ташкилот вакиллари Мирзо Улуғбек туманида жорий этилган замонавий бошқарув ёндашувлари, очиқлик ва самарадорликни таъминлашга қаратилган тизимли ишларни юқори баҳолади. Шунингдек, улар бундай илғор тажрибалар ҳудудларни барқарор ривожлантириш ва аҳолига кўрсатилаётган хизматлар сифатини оширишда муҳим аҳамият касб этишини таъкидладилар.
