Болаларни ташиш қоидаларини бузганлар 15 суткагача қамалиши мумкин
Ўзбекистонда болаларни ташиш қоидаларини бузганлик учун 30 БҲМ миқдорида жарима ва ҳайдовчилик ҳуқуқидан маҳрум қилиш таклиф этилди.
Маъмурий жавобгарлик тўғрисидаги кодексга болаларни ташиш ва болаларни ташишни ташкил этиш қоидаларини бузганлик учун алоҳида жавобгарлик белгилашни назарда тутувчи қонун лойиҳаси жамоатчилик муҳокамасига тақдим этилди.
Қонун лойиҳасига кўра, кодекс 128-11-модда билан тўлдирилиши режалаштирилган.
Унга мувофиқ, болаларни ташиш қоидаларини бузган ҳайдовчиларга 30 БҲМ миқдорида жарима солиш ҳамда уларни бир йилдан уч йилгача транспорт воситасини бошқариш ҳуқуқидан маҳрум қилиш таклиф этилмоқда.
Агар ушбу қоидабузарлик транспорт воситасини бошқариш ҳуқуқига эга бўлмаган ёки ҳайдовчилик ҳуқуқидан маҳрум қилинган шахс томонидан содир этилса, 50 БҲМ миқдорида жарима ёки 15 суткагача маъмурий қамоқ жазоси қўлланиши мумкин.
Шунингдек, болаларни ташишни ташкил этиш қоидаларини бузганлик учун ҳам 30 БҲМ миқдорида жарима жорий этилиши таклиф этилган. Мазкур ҳуқуқбузарлик маъмурий жазо қўлланилганидан кейин бир йил ичида такроран содир этилса, жарима миқдори 50 БҲМгача оширилади.
