Эрон ЖЧдаги чекловлар сабаб FIFАга шикоят қилади
Эрон томони норозилиги АҚШ ҳудудига кириш ва тайёргарлик машғулотлари учун белгиланган вақт чекловларига қаратилган.
Эрон футбол федерацияси (FFIRI) 2026 йилги FIFА Жаҳон чемпионатига тайёргарлик жараёнида миллий терма жамоага қўйилган айрим ташкилий чекловлар юзасидан ФИФАга расмий шикоят юборишини маълум қилди. Бу ҳақда The Telegraph журналисти Жеймс Дакер FFIRIбаёнотига таяниб хабар берди.
Федерация вакилларининг билдиришича, асосий норозилик Эрон терма жамоасига АҚШ ҳудудига кириш ва машғулот жараёнларини ташкил этиш бўйича қўйилган вақт чекловлари билан боғлиқ. Хусусан, жамоага Бельгияга қарши ўйин ўтказиладиган Лос-Анжелесга фақат ўйин арафасида киришга рухсат берилгани танқид қилинмоқда.
FFIRI бундай қарорлар барча иштирокчи жамоалар учун тенг шароит тамойилига зид эканини ва бу ҳолат терма жамоанинг тайёргарлик жараёнига салбий таъсир кўрсатишини таъкидлаган.
Шунингдек, Эрон томони аввалроқ Мексиканинг Тихуана шаҳридаги машғулот базасидан АҚШга икки кун олдин етиб бориш режасини илгари сурган, бироқ бу таклиф рад этилгани ҳам маълум қилинган.
Федерация мазкур вазият юзасидан FIFАга тегишли тартибда расмий шикоят юборилишини ва масала халқаро футбол ташкилоти доирасида кўриб чиқилишини билдирган.
