Тошкентда Кичик ҳалқа автомобиль йўлининг бир қисмида ҳаракат вақтинча чекланади
КҲАЙнинг Чилонзор туманидан ўтган қисмида транспорт ҳаракати 19 июнь соат 23:00 дан 22 июнь соат 06:00 гача чекланади.
Тошкент шаҳрида Кичик ҳалқа автомобиль йўлининг Чилонзор туманидан ўтган қисмида қурилиш-монтаж ишлари олиб борилиши муносабати билан транспорт воситалари ҳаракати вақтинча чекланади. Бу ҳақда Тошкент шаҳар ЙҲТЕМ хабар берди.
Маълум қилинишича, чекловлар 2026 йил 19 июнь соат 23:00 дан 22 июнь соат 06:00 гача Кичик ҳалқа автомобиль йўлининг Тошкент давлат педагогика университети олдидан Дилхуш 2-тор кўчаси кесишмасигача бўлган қисмида амал қилади.
Ушбу даврда мазкур йўналиш бўйлаб ҳаракатланадиган автобуслар ва бошқа транспорт воситалари белгиланган айланма йўналишлар орқали ташкил этилади.
Масъул идоралар ҳайдовчилардан юзага келиши мумкин бўлган ноқулайликлар учун узр сўраб, ҳаракат йўналишларини олдиндан режалаштиришни тавсия қилди.
