Ўзбекистон ва Хитой чўлланишга қарши кураш бўйича янги ҳамкорлик битимларини имзолади

 

Хитойнинг Инчуан шаҳрида бўлиб ўтаётган “Чўлланишга қарши курашиш йўналишида Хитой – Марказий Осиё ҳамкорлиги” халқаро конференцияси доирасида Экология ва иқлим ўзгариши миллий қўмитаси ҳузуридаги Ўрмон агентлиги делегацияси хитойлик ҳамкорлар билан икки муҳим ҳамкорлик битимини имзолади.

 

Дастлаб, Ўрмон агентлиги директори Эркин Муҳиддинов ҳамда Хитойнинг Нингхуа ўрмон хўжалиги ва яйловлар бошқармаси раҳбари Ву Сяруй ўртасида ҳамкорлик битими имзоланди. Мазкур ҳужжат иҳота ўрмонлари барпо этиш, ҳудудларнинг яшиллик даражасини ошириш, замонавий кўчатхоналар ва оналик плантацияларини ташкил этиш, барқарор ўрмон хўжалиги ҳамда яшил саноатни ривожлантиришга қаратилган қўшма лойиҳаларни амалга оширишни назарда тутади.

 

Шунингдек, томонлар сув ресурсларидан оқилона фойдаланиш, деградацияга учраган ерларни тиклаш, тупроқ шўрланишининг олдини олиш ҳамда экотизимларни босқичма-босқич мустаҳкамлаш йўналишларида ҳам ҳамкорликни йўлга қўйишга келишиб олдилар.

 

Конференция доирасида Ўрмон агентлиги ва Хитойнинг “Yinchuan Wolsenn Modern Irrigation Co., Ltd” компанияси ўртасида ҳам алоҳида ҳамкорлик битими имзоланди. Унга кўра, хитойлик ҳамкорлар Ўзбекистонга сувни тежовчи замонавий суғориш технологиялари — фертигация намойиш тизимларини етказиб беради ҳамда маҳаллий мутахассислар учун мунтазам ўқув дастурларини ташкил этади. Лойиҳанинг умумий қиймати қарийб 110 минг юанга тенг.

 

Мутахассисларнинг таъкидлашича, фертигация технологияси суғориш суви билан бирга минерал ўғитларни ҳам ўсимлик илдизига бевосита етказиб беришга хизмат қилади. Ушбу усул ўғит сарфини 20–50 фоизгача қисқартириш, сувдан самарали фойдаланиш ва меҳнат унумдорлигини ошириш имконини беради.

 

Таъкидланишича, мазкур замонавий технологияларнинг жорий этилиши мамлакатимизда янги ўрмонзорлар барпо этиш ва чўлланишга қарши кураш тадбирларининг самарадорлигини сезиларли даражада оширади.

 

Маълумот учун, 2025 йилда Ўзбекистон ва Хитой ҳамкорлиги доирасида Арнасой, Кармана, Муборак, Қоракўл ва Нукус туманларида галофит ўсимликлари боғлари ташкил этилган. Мамлакатимизга Хитойдан 1,4 минг тонна галофит ўсимликлари уруғлари олиб келинган бўлиб, ҳозирда улардан кўчат етиштириш ишлари олиб борилмоқда.

 

Бундан ташқари, Ўрмон агентлиги ва Хитойнинг “Sinoway Forest” компанияси ҳамкорлигида амалга оширилаётган “Зарарли углеродларни ютувчи ўрмон хўжалигини ривожлантириш ва экотизимларни тиклаш” лойиҳаси доирасида Сурхондарё вилоятида 5 минг гектар майдонда пистазорлар барпо этиш ишлари давом этмоқда.