“Бўйим узун эмас, аммо керакли жойда бўлишни биламан” — Аббосбек Файзуллаев
Футболчи Колумбия дарвозасига урган голи ҳақида гапириб, ўзини тарихга кирган бахтли инсон деб ҳис қилишини айтди.
Ўзбекистон миллий терма жамоаси аъзоси Аббосбек Файзуллаев Колумбия дарвозасига киритган голи ва бош билан ўйнашдаги услуби ҳақида фикр билдириб, ўша вазиятда омад ҳам муҳим роль ўйнаганини таъкидлади.
Футболчининг айтишича, тўпнинг айнан ўзи турган нуқтага келиб қолиши қанчалик омад бўлмасин, керакли вақтда керакли жойда бўлиш ҳам катта аҳамиятга эга.
— Ўша пайт тўпнинг келиб қолгани ҳам балки омаддир, билмайман. Ўзимни бахтли инсон деб ҳис қиламан. Ахир, тарихга кирганимнинг ўзи катта бахт. Ўзимни бош билан жуда яхши ўйнайдиган футболчи деб айта олмайман. Лекин керакли вазиятда, керакли жойда бўлишим кўп ёрдам беради, — деган Файзуллаев.
Унинг таъкидлашича, бош билан самарали ўйнаш учун фақат бўй етарли эмас, балки тўғри позиция танлаш ҳам муҳим омил ҳисобланади.
— Бўйим баланд эмас, ҳимоячилардан устун томоним йўқ. Шу сабабли жуда кўп футбол томоша қиламан. Деярли ҳеч бир учрашувни ўтказиб юбормасликка ҳаракат қиламан. Ҳужумчиларнинг қаерга ва қачон югуришини кузатаман, ўрганаман. Бу ҳам катта ёрдам беради, — дея таъкидлаган футболчи.
Файзуллаевнинг фикрича, бўйи пастлиги баъзан унинг фойдасига ҳам ишлайди.
— Ҳимоячилар мендан бош билан зарба чиқишини ҳар доим ҳам кутишмайди. Балки бу жиҳатнинг ўзига яраша афзаллиги бордир. Энг муҳими — тўғри жойни танлаш ва ўша ерда вақтида пайдо бўлиш, — деган у.
