Эронлик хонанда ҳижобсиз чиқиш қилгани учун 74 дарра урилди
Мусиқачилар “жамоат ахлоқини ҳақорат қилувчи қўпол ва ахлоқсиз контент тайёрлаш ҳамда тарқатиш”да айбдор деб топилган.
Эрон судлари хонанда Парасту Аҳмади ва унинг ижодий жамоаси аъзоларига нисбатан ҳукм чиқарди. The Guardian нашри хабарига кўра, санъаткор 2024 йил декабрь ойида интернет орқали намойиш этилган концертда ҳижобсиз саҳнага чиққани учун 74 дарра билан жазоланишга ҳукм қилинган.
Шунингдек, хонанданинг ижодий жамоасидаги саккиз нафар аъзога ҳам худди шундай жазо тайинланган. Бундан ташқари, уларга икки йил давомида мамлакатдан чиқиш ҳамда ижодий фаолият билан шуғулланиш тақиқланган.
Қум вилояти Жиноят ишлари бўйича суди мусиқачиларни “жамоат ахлоқини ҳақорат қилувчи қўпол ва ахлоқсиз контент тайёрлаш ҳамда тарқатиш”да айбдор деб топган.
Маълумотларга кўра, 2024 йил 11 декабрь куни 29 ёшли Парасту Аҳмади YouTube платформасида “Az Khoone Javanane Vatan” номли ватанпарварлик қўшиғини жонли ижро этган. Хонанда елкалари очиқ қора либосда, ҳижобсиз ҳолда саҳнага чиққан. Эрон қонунчилигига мувофиқ, аёлларнинг жамоат жойларида яккахон чиқиш қилиши ва ҳижобсиз саҳнага чиқиши тақиқланган.
Трансляция илк 24 соат ичида қарийб 500 минг марта томоша қилинган бўлса, бир неча кун ичида кўришлар сони 2 миллионга яқинлашган. Кўп ўтмай хонанда ва бир неча мусиқачилар қисқа муддатга ҳибсга олиниб, кейинчалик қўйиб юборилган. Шундан сўнг уларга нисбатан жиноий иш қўзғатилган.
