Исроилнинг Ливандаги ҳаракатлари АҚШ-Эрон келишувига зарба бериши мумкин — WP
АҚШ разведкаси Нетаняхунинг Ливандаги сиёсати Трамп маъмурияти ва Эрон ўртасидаги келишувга путур етказиши мумкинлигидан огоҳлантирди.
АҚШ разведка идоралари Исроил бош вазири Бенямин Нетаняхунинг ҳаракатлари президент Доналд Трамп маъмурияти ва Эрон ўртасида эришилган узоқ муддатли тинчлик келишуви истиқболларига салбий таъсир кўрсатиши мумкинлиги ҳақида Оқ уйни огоҳлантирди. Бу ҳақда The Washington Post америкалик расмийларга таяниб хабар берди.
Нашр маълумотларига кўра, мазкур огоҳлантириш Исроил ҳукумати ва Трамп маъмурияти ўртасида айрим масалалар юзасидан келишмовчиликлар кучайиб бораётган бир пайтда янграган.
Разведка ҳисоботларида Исроилнинг Ливандаги ҳарбий амалиётларни давом эттириш ниятида экани қайд этилган. Бу эса АҚШ ва Эрон ўртасида эришилган келишувнинг муҳим бандларидан бири бўлган минтақадаги кескинликни камайтириш бўйича мажбуриятларга зид келиши мумкин.
Манбаларга кўра, кузда Исроилда бўлиб ўтадиган парламент сайловлари арафасида Бенямин Нетаняхунинг сиёсий позицияси ички аудиторияга Ливандан қўшинларни олиб чиқмаслиги ва «Ҳизбуллоҳ»га нисбатан қатъий сиёсат юритишини намойиш эта олишига ҳам боғлиқ.
Ҳисоботда АҚШ ва Эрон ўртасидаги келишув шартлари Исроилда норозилик уйғотаётгани ҳам таъкидланган. Айрим исроиллик сиёсатчилар ва расмийлар мазкур келишув Теҳронга нисбатан “максимал босим” сиёсатини заифлаштириши ҳамда Исроилнинг хавфсизлик манфаатларига салбий таъсир кўрсатиши мумкинлигини билдирган.
Шунингдек, таҳлилчиларга кўра, Исроил Ливандаги ҳарбий операцияларни тўхтатган тақдирда ҳам Жанубий Ливандан қўшинларини олиб чиқишдан бош тортса, бу АҚШ ва Эрон ўртасида эришилган келишувнинг барқарорлигига хавф туғдириши мумкин.
АҚШнинг юқори мартабали амалдорларидан бири эса Исроил ва «Ҳизбуллоҳ» ўртасидаги ўт очишни тўхтатиш бўйича сулҳ Туркия вақти билан соат 16:00 да кучга кирганини маълум қилган.
