Хориждаги нуфузли олийгоҳларни тугатганлар маошига қўшимча устама тўланади
Қўшимча тўловлар бакалавриат, магистратура ва PhD даражаларига эга мутахассислар учун белгиланган бўлиб, уч йилгача муддат давомида ажратилади.
Ўзбекистонда нодавлат нотижорат ташкилотлари (ННТ) соҳасида фаолият юритаётган ёш ва истиқболли кадрларни қўллаб-қувватлашнинг янги механизми жорий этилмоқда. Бу ҳақда Олий таълим, фан ва инновациялар вазирлиги маълум қилди.
Мазкур тартиб “Ўзбекистон — 2030” стратегиясини “Маҳаллани ривожлантириш ва жамиятни юксалтириш йили”да амалга оширишга оид давлат дастурининг 260-банди асосида йўлга қўйилади.
Унга кўра, ТОP–200 ва ТОP–500 халқаро рейтингдаги хорижий олий таълим муассасаларини тамомлаб, ННТларда фаолият юритаётган ёш мутахассисларга лавозим маошига қўшимча устамалар тўланади.
Қўшимча тўловлар бакалавриат, магистратура ва PhD даражаларига эга мутахассислар учун белгиланган бўлиб, уч йилгача муддат давомида ажратилади.
Топ 200 халқаро рейтингдаги ОТМни битирган ёш мутахассисга:
- бакалавриат учун БҲМнинг 7 баравари (2 млн 884 минг сўм),
- магистратура учун БҲМнинг 10 баравари (4 млн 120 минг сўм),
- PhD ёки унга тенглаштирилган илмий даража учун БҲМнинг 15 баравари (6 млн 185 минг сўм) миқдорида устама тўланади.
Топ 500 халқаро рейтингдаги ОТМни битирган ёш мутахассисга:
- бакалавриат учун БҲМнинг 5 баравари (2 млн 60 минг сўм),
- магистратура учун БҲМнинг 7 баравари (2 млн 884 минг сўм),
- PhD ёки унга тенглаштирилган илмий даража учун БҲМнинг 10 баравари (4 млн 120 минг сўм) миқдорида устама тўланади.
Ёш мутахассис устаманинг фақат битта туридан30 ёшгача фойдаланади. Устама олиш учун аризалар www.ngo.uz платформаси орқали қабул қилинади.
