Бўстонлиқда каналга тушиб кетган болалардан бирининг жасади топилди
Ғаввос-қутқарувчилар иккинчи болани қидириш ишларини давом эттирмоқда.
Тошкент вилояти Фавқулодда вазиятлар бош бошқармаси Бўстонлиқ туманида содир бўлган бахтсиз ҳодиса юзасидан маълумот берди.
Қайд этилишича, 17 июнь куни «Обод» маҳалла фуқаролар йиғини ҳудудида яшовчи 2016 ва 2018 йилларда туғилган икки нафар вояга етмаган бола яшаш уйи яқинидан оқиб ўтувчи Бўзсув каналига эҳтиётсизлик оқибатида тушиб кетган.
Ҳодиса юзасидан фавқулодда хизматларга хабар берилган ва дарҳол қидирув-қутқарув ишлари бошланган.
21 июнь куни ғаввос-қутқарувчилар томонидан ўтказилган қидирув ишлари натижасида бир нафар боланинг жасади сувдан топилган.
Ҳозирда иккинчи болани қидириб топиш бўйича ғаввос-қутқарувчилар иштирокида қидирув-қутқарув ишлари узлуксиз давом эттирилмоқда.
