Ўзбекистон ёш метрологлари халқаро танловда совринли ўринларни эгаллади
Санкт-Петербургда ўтган МДҲнинг энг яхши ёш метрологи танловида Ўзбекистон вакиллари I ва II ўринларни қўлга киритди.
Жорий йил 16–17 июнь кунлари Россия Федерациясининг Санкт-Петербург шаҳрида “КEЛАЖАК БИЗНИКИ” (“ЗА НАМИ БУДУЩЕЕ”) шиори остида IV Халқаро илмий-амалий ёш олимлар ва мутахассислар анжумани бўлиб ўтди.
Мазкур анжуман доирасида ўтказилган “МДҲнинг энг яхши ёш метрологи” I Халқаро танловида МДҲга аъзо давлатлардан 40 нафар ёш мутахассис иштирок этди.
Танлов давомида иштирокчилар метрологиянинг илмий, амалий ҳамда рақамлаштириш йўналишлари бўйича топшириқларни бажариб, ўз билим ва кўникмаларини, шунингдек, инновацион лойиҳаларини тақдим этдилар.
Қувонарлиси, танлов якунларига кўра Ўзбекистон номидан иштирок этган ЎзММИ ходимлари совринли ўринларни эгаллади.
Хусусан, илмий метрология йўналишида Таубалдиев Азамат фахрли I ўринни, метрологияни рақамлаштириш йўналишида эса Мухаммад Аминов Ахмадбек II ўринни қўлга киритди.
Мазкур натижалар ёш мутахассисларнинг юқори илмий салоҳияти, касбий тайёргарлиги ҳамда мамлакатимизда метрология соҳасида ёш кадрларни қўллаб-қувватлаш борасида амалга оширилаётган тизимли ишларнинг амалий ифодасидир.
