Ўзбекистонликлар Ветнамга киришнинг янги қоидалари ҳақида огоҳлантирилди
Янги тартибга кўра, йўловчилардан мамлакатга киришдан камида 72 соат олдин махсус электрон шаклни тўлдириш талаб этилади.
Ветнам Социалистик Республикаси Иммиграция хизмати мамлакатга кирувчи барча хорижий фуқаролар учун мажбурий электрон рўйхатдан ўтиш тизимини (Pre-Arrival Information) жорий этди. Бу ҳақда Uzbekistan Airways матбуот хизмати маълум қилди.
Қайд этилишича, янги тартиб 2026 йил 22 июндан кучга киради ва 23 июндан бошлаб Uzbekistan Airways'нинг HY561 рейси билан Ветнамга йўл олувчи йўловчиларга ҳам татбиқ этилади.
Янги талабларга кўра, Ветнамга сафар қилаётган хорижий фуқаролар мамлакатга етиб боришдан камида 72 соат олдин махсус электрон шаклни тўлдириши шарт. Бунинг учун йўловчилар Ветнам Иммиграция хизмати томонидан ишга туширилган расмий портал — prearrival.immigration.gov.vn орқали рўйхатдан ўтишлари лозим.
Ариза муваффақиятли расмийлаштирилгач, йўловчига QR-код тақдим этилади. Мазкур QR-код чегарадан ўтиш вақтида тақдим этилиши учун смартфонда сақлаб қўйилиши ёки қоғозга чоп этилиши тавсия этилади.
Uzbekistan Airways Ветнамга сафар қилишни режалаштираётган фуқаролардан янги талабларни олдиндан бажариш ва ҳужжатларни ўз вақтида расмийлаштиришни сўради.
