АҚШ Миллий разведка тизимида оммавий ишдан бўшатишлар бошланди
Оқ уй мазкур қарор Доналд Трампнинг давлат идораларини оптималлаштириш сиёсати билан боғлиқлигини билдирди.
АҚШ Миллий разведка бошқармаси тизимида кенг кўламли ходимларни қисқартириш жараёни бошланди. Бу ҳақда СNN телеканали манбаларга таяниб хабар берди.
Маълумотларга кўра, Миллий разведка директори вазифасини бажарувчи Билл Пульте томонидан бошланган қисқартиришлар Миллий разведка директори идорасидаги юзлаб лавозимларга таъсир қилиши мумкин. Шунингдек, Миллий аксилтерроризм маркази ҳамда Миллий аксилразведка ва хавфсизлик маркази энг кўп қисқартиришлар кутилаётган тузилмалар қаторига киради.
Мазкур ўзгаришлар АҚШ Конгрессидаги демократ қонунчилар орасида хавотир уйғотди. Сенат ва Вакиллар палатасининг разведка қўмиталари аъзолари Марк Уорнер ва Жим Хаймс Билл Пультега мурожаат йўллаб, бундай қисқартиришлар миллий хавфсизликка салбий таъсир кўрсатиши мумкинлигини таъкидладилар. Улар, шунингдек, бундай қарорларни амалга оширишда Конгресс розилиги зарурлигини эслатиб ўтган.
Оқ уй эса АҚШ президенти Доналд Трампнинг Truth Social платформасидаги баёнотига ишора қилиб, қисқартиришлар давлат идоралари фаолиятини оптималлаштириш ва самарадорлигини оширишга қаратилганини маълум қилган.
Билл Пульте июнь ойи бошида Миллий разведка директори вазифасини бажарувчи этиб тайинланган эди. Бунгача у Федерал уй-жой молиялаштириш агентлигига раҳбарлик қилган. ОАВ маълумотларига кўра, унинг разведка ва миллий хавфсизлик соҳасида аввалги тажрибаси бўлмаган.
