Қорақалпоғистонда фуқаро кредит қарзи сабаб машинасидан айрилди
Тахиатошда қарздорнинг “JETOUR” автомашинаси банк балансига ўтиб кетди.
Мажбурий ижро бюроси Қорақалпоғистон Республикаси бошқармаси иш юритувида бўлган, Фуқаролик ишлари бўйича Чимбой туманлараро судининг ижро ҳужжатига асосан қарздор А.С.дан АТБ “Бизнесни ривожлантириш банки” Нукус филиали фойдасига 388 млн сўм ундириш белгиланган.
Бўлим давлат ижрочилари томонидан қарздорга ижро ҳужжати ижросини таъминлаш учун 15 кунлик ихтиёрий муддат берилган ва унга тегишли JETOUR X90 PLUS русумли автомашина тегишли тартибда хатлаб қўйилган.
Шунга қарамасдан, қарздор томонидан ижро ҳужжати талаби ихтиёрий равишда бажарилмаганлиги сабабли, хатланган автомобил электрон онлайн-аукцион савдо майдончаси орқали сотувга чиқарилган.
Жорий йилнинг июнь ойида ўтказилган аукцион савдоларида сотувга чиқарилган автомобилга харидор топилмаганлиги сабабли ушбу мулк қарздорлик эвазига АТБ “Бизнесни ривожлантириш банки” балансига ўтказиб берилган.
