Ўзбекистонда 1,5 миллиондан ортиқ талаба таҳсил олмоқда, уларнинг аксарияти қизлар — Саида Мирзиёева
Президент администрацияси раҳбари қизларнинг таълим олиши жамият тараққиётининг муҳим омили эканини таъкидлади.
Президент администрацияси раҳбари Саида Мирзиёева мамлакатда қизларнинг таълим олиш имкониятлари тобора кенгайиб бораётгани ва бу борадаги ислоҳотлар ўз самарасини бераётганини таъкидлади.
Қайд этилишича, бугунги кунда Ўзбекистон олий таълим муассасаларида 1,5 миллиондан ортиқ талаба таҳсил олмоқда. Уларнинг ярмидан кўпини қизлар ташкил этмоқда. Бу эса Президент ташаббуси билан таълим соҳасида амалга оширилаётган кенг кўламли ислоҳотлар натижаси экани қайд этилди.
Саида Мирзиёева минглаб оилалар қиз фарзандларининг таълим олиши ва касб эгаллашига ишонч билдираётганини, қизлар эса ўзлари қизиққан йўналишларда таҳсил олиб, изланишлар билан шуғулланаётганини таъкидлади.
Шунингдек, у билимли қиз нафақат ўз ҳаётини, балки оиласи, атрофидаги муҳит ва бутун мамлакат келажагини ўзгартиришга қодир эканини қайд этди.
Саида Мирзиёева таълим инсоннинг ҳаёт йўлини мустақил танлаши учун куч ва эркинлик беришини таъкидлаб, қизларнинг ўз орзулари сари дадил қадам ташлашлари учун зарур шароит ва имкониятларни яратиш муҳимлигини қайд этди.
