АҚШ Сенати Эрон билан урушни тўхтатиш ҳақидаги резолюцияни қабул қилди

АҚШ Сенати Эронга қарши ҳарбий ҳаракатларни якунлаш ва Америка қўшинларини жанговар операциялардан олиб чиқишга чақирувчи резолюцияни қабул қилди. Ҳужжатни 50 сенатор қўллаб-қувватлаган бўлса, 48 сенатор унга қарши овоз берган. Бу ҳақда Bloomberg хабар берди.

 

Маълум қилинишича, резолюция Доналд Трамп маъмуриятини Конгресс рухсатисиз олиб борилаётган ҳарбий операцияларни тўхтатишга чақиради. Ҳужжатда Америка ҳарбий кучлари Эронга қарши жанговар ҳаракатлардан чиқарилиши лозимлиги қайд этилган.

 

Овоз бериш жараёнида ҳукмрон Республикачилар партиясининг тўрт нафар аъзоси резолюцияни қўллаб-қувватлаган. Демократлар орасида эса фақат бир сенатор ҳужжатга қарши овоз берган. 

 

Аввалроқ шунга ўхшаш резолюция АҚШ Вакиллар палатаси томонидан ҳам маъқулланганди.

 

Бироқ мутахассисларнинг таъкидлашича, мазкур резолюция тавсиявий характерга эга бўлиб, ҳуқуқий мажбурий кучга эга эмас. У Конгресс аъзоларининг сиёсий позициясини ифодалайди ва ижро ҳокимияти томонидан бажарилиши шарт ҳисобланмайди.

 

Резолюцияда АҚШ қуролли кучларининг Эронга қарши операцияларда иштироки фақат Конгресс розилиги мавжуд бўлган ёки мамлакат ҳамда унинг иттифоқчиларини ҳимоя қилиш зарурати юзага келган ҳолатлардагина давом эттирилиши мумкинлиги таъкидланган.

 

Шу билан бирга, Вашингтон ва Теҳрон ўртасидаги дипломатик мулоқотлар ҳам давом этмоқда. Хусусан, Швейтсариянинг Бюргенсток шаҳрида Қатар ва Покистон воситачилигида ўтказилган музокараларда томонлар кескинликни камайтириш ва кейинги техник музокаралар учун асос яратишга қаратилган қатор масалаларни муҳокама қилган.