Давлат идораларидаги комплаенс тузилмалари ҳимояси кучайтирилади
Комплаенс ходимларига нисбатан жиноят иши фақат Бош прокурор томонидан қўзғатилиши белгиланди.
Президент томонидан 22 июнь куни имзоланган қонун билан давлат органлари ва ташкилотларида фаолият юритаётган комплаенс хизматларининг хавфсиз кафолатларига қаратилган янги нормалар жорий этилди.
Қонунга мувофиқ, комплаенс тузилмалари ходимлари эндиликда тегишли ташкилотларнинг объектларига тўсқинликсиз кириш, ўз фаолиятини амалга ошириш учун зарур бўлган ҳужжатлар ва ахборотлар билан танишиш, шунингдек, аниқланган коррупциявий ҳолатлар юзасидан тақдимномалар киритиш ваколатига эга бўлади.
Шунингдек, давлат органи ёки ташкилотининг биринчи раҳбарида коррупцияга оид ҳуқуқбузарлик аломатлари аниқланган ёхуд уни жиноий гуруҳ фаолиятига раҳнамолик қилаётган деб ҳисоблаш учун етарли асослар мавжуд бўлган тақдирда, комплаенс бўйича масъул ўринбосарга юқори турувчи комплаенс хизмати билан келишилган ҳолда тегишли ҳужжатлар ва маълумотларни ҳуқуқни муҳофаза қилувчи органларга бевосита тақдим этиш ваколати берилди.
Қонун билан комплаенс тузилмалари ходимларининг ҳуқуқий ҳимояси ҳам кучайтирилди. Хусусан, уларга нисбатан жиноят иши фақат Бош прокурори томонидан қўзғатилиши мумкинлиги белгиланди.
Мазкур янгиликлар давлат органлари ва ташкилотларида коррупцияга қарши ички назорат тизимининг мустақиллиги ва таъсирчанлигини ошириш, комплаенс хизматлари фаолияти учун қўшимча ҳуқуқий кафолатлар яратиш ҳамда коррупцияга қарши курашиш механизмларини янада такомиллаштиришга хизмат қилади.
