Moody’s Ўзбекистоннинг кредит рейтингини “Ba2” даражасига кўтарди
Саида Мирзиёева буни мамлакат иқтисодий ислоҳотларининг муҳим натижаси сифатида баҳолади.
Халқаро рейтинг агентлиги Moody’s Ratings Ўзбекистоннинг суверен кредит рейтингини бир поғона юқорига ошириб, уни “барқарор” прогноз билан “Bа2” даражасида баҳолади. Бу ҳақда Саида Мирзиёева ўз саҳифасида маълум қилди.
Унинг таъкидлашича, мазкур натижа Президент раҳбарлигида мамлакат иқтисодий салоҳиятини мустаҳкамлаш бўйича амалга оширилаётган тизимли ислоҳотлар самараси ҳисобланади.
Саида Мирзиёева кредит рейтингининг яхшиланиши амалий жиҳатдан янада қулай шартлардаги инвестицияларни жалб этиш, арзонроқ молиявий ресурслардан фойдаланиш имкониятлари, янги корхоналар ташкил этилиши ва қўшимча иш ўринлари яратилишини англатишини қайд этди.
Шунингдек, у Ўзбекистонда кучли, очиқ ва рақобатбардош иқтисодиётни барпо этиш ҳамда фуқаролар учун муносиб келажакни таъминлаш йўлидаги ишлар давом эттирилишини таъкидлади.
