АҚШ суди Эпштейн шерикларининг исмларини ошкор этишни талаб қилди

АҚШ федерал суди Адлия вазирлигига можароли молиячи Жеффри Эпштейн иши бўйича айрим ҳужжатларни, жумладан, унинг эҳтимолий шериклари исмларини ошкор этиш ёки ҳужжатлардаги махфийлаштирилган ҳар бир қисм нима сабабдан ёпиб қўйилганини қонуний жиҳатдан асослаб беришни буюрди. Бу ҳақда РИА Новости танишиб чиққан суд ҳужжатида келтирилган.

 

Маълум қилинишича, 2026 йил апрель ойида журналист Кети Панг АҚШ Адлия вазирлиги ва бош прокурор вазифасини бажарувчи Тодд Бланш устидан судга даъво аризаси киритган. У вазирликни Эпштейннинг эҳтимолий шериклари исмларини яширгани ҳамда иш ҳужжатларининг катта қисмини асоссиз равишда махфийлаштиргани учун айблаган.

 

Суд қарорига кўра, Адлия вазирлиги 2 июлга қадар жўнатувчи ва қабул қилувчиларнинг тўлиқ исмлари кўрсатилган саккизта хатни, эҳтимолий шериклар исмлари қайд этилган иккита ҳужжатни, Федерал қидирув бюросининг тўртта ҳисоботига оид дастлабки хизмат қайдларини, шунингдек, хориждан олинган материалларни эълон қилиши керак.

 

Агар вазирлик бу талабни бажармаса, судга ҳар бир ҳужжат ёки унинг ёпиб қўйилган қисми нима сабабдан махфий сақланиши лозимлигини алоҳида асослаб бериши шарт.

 

Бундан ташқари, Адлия вазирлиги федерал реестрда ҳужжатлардаги барча махфийлаштирилган қисмлар рўйхатини эълон қилиши ҳамда Эпштейн иши бўйича янги материаллар ошкор қилинган сари ушбу рўйхатни мунтазам янгилаб бориши лозим.

 

Эслатиб ўтамиз, 2019 йилда Жеффри Эпштейнга АҚШда вояга етмаганларни жинсий эксплуатация қилиш мақсадида одам савдоси билан шуғулланганлик айблови қўйилганди. У ўша йил июль ойида қамоқхонада вафот этган. Тергов унинг ўз жонига қасд қилгани ҳақида хулоса чиқарган.

 

АҚШ бош прокурори ўринбосари (ҳозирда бош прокурор вазифасини бажарувчи) Тодд Бланш жорий йил 30 январь куни Эпштейн иши бўйича ҳужжатларни эълон қилиш жараёни якунланганини маълум қилган.

 

Очиқланган материаллар ҳажми 3,5 миллиондан ортиқ файлни ташкил этади.