АҚШ Қувайт ва Саудия Арабистонидаги ҳарбий базаларини кўчириши мумкин — WSJ
Пентагон айрим ҳарбий объектларни Эрон ракеталари етиб бормайдиган ҳудудларга кўчириш вариантини муҳокама қилмоқда.
АҚШ Яқин Шарқдаги айрим ҳарбий базаларини Эрон ракета ва дронлари таҳдидидан узоқроқ ҳудудларга кўчириш имкониятини муҳокама қилмоқда. Бу ҳақда The Wall Street Journal (WSJ) манбаларга таяниб хабар берди.
Нашрга кўра, Пентагон Баҳрайндаги ҳарбий базани модернизация қилиш, шунингдек, Қувайт ва Саудия Арабистонидаги Америка ҳарбий иштирокини қисқартириш масаласини кўриб чиқмоқда. Режаларга мувофиқ, айрим базалар ёки уларнинг функцияларини Эрон зарба воситалари етиб бормайдиган ғарбий ҳудудларга кўчириш эҳтимоли ҳам ўрганилмоқда.
WSJ маълумотига кўра, кўриб чиқилаётган вариантлардан бири Исроил бўлиб, у ерда можаро даврида АҚШнинг қирувчи самолётлари ва ёнилғи қуювчи ҳаво кемалари жойлаштирилган.
Нашрнинг ёзишича, АҚШ минтақадаги айрим ҳарбий объектларга етказилган зарар кўламини ошкор қилмаган. Хусусан, Баҳрайндаги АҚШ Ҳарбий-денгиз кучларининг Naval Support Activity Bahrain базаси бир неча бор ҳужумга учраган. Оқибатда қўмондонлик бинолари, алоқа терминаллари ва бошқа иншоотларга жиддий зарар етгани айтилмоқда.
Шунингдек, минтақадаги ҳарбий ва дипломатик объектларни ўз ичига олган камида 20 та Америка объектига зарбалар берилгани қайд этилган. Айрим иншоотлар қайта тикланмаслиги мумкинлиги, қўмондонлик марказларини эса ер остига кўчириш масаласи ҳам муҳокама қилинаётгани таъкидланган.
Нашр эслатишича, 21 июнь куни АҚШ ва Эрон вакиллари Қатар ҳамда Покистон воситачилигида Швейцариянинг Бургенсток шаҳрида музокаралар ўтказган. Томонлар учрашувни конструктив руҳда ўтганини билдириб, кейинги техник музокаралар учун замин яратилганини маълум қилган.
