Тошкентда ота фарзанди учун 50 минг доллар алимент тўлади
Эътиборлиси, ота фарзанди учун 176 млн сўм алимент белгиланган, бироқ у 50 минг АҚШ доллари миқдорида алимент тўлашга қарор қилган.
Фуқаролик ишлари бўйича Учтепа туманлараро судининг буйруғига асосан қарздор У. Х.дан ундирувчи М.Х. фойдасига вояга етмаган уч нафар фарзанди таъминоти учун улар вояга етгунга қадар ҳар ойда қарздорнинг иш ҳақи ва бошқа даромадларининг 1/2 қисми миқдорида алимент ундириш белгиланган.
Мазкур ижро ҳужжати 23.05.2023 йил куни МИБнинг Учтепа туман бўлими иш юритувига келиб тушиб, ижро иши қўзғатилган ҳамда белгиланган тартибда ижро ҳаракатлари амалга оширилган.
Кейинчалик қарздор ота фарзандларининг таъминоти учун тўланиши лозим бўлган алимент маблағларини олдиндан ҳисоблаб беришни сўраб мурожаат қилган.
Шунга кўра, Мажбурий ижро бюросининг электрон дастури орқали алимент маблағлари 2026 йил 1 апрелдан 2031 йил 1 июлга қадар бўлган давр учун ҳисобланиб, жами 176 458 966 сўм миқдорида алимент тўлови белгиланган.
Бироқ ота фарзандларининг келажагига сармоя сифатида у 50 минг АҚШ доллари миқдоридаги маблағни алимент тўлови тарзида олдиндан тўлаб берган.
