Ўзбекистонда ўртача умр кўриш давомийлиги 75,4 ёшга етди
Сўнгги 30 йилда ўзбекларнинг умр кўриш давомийлиги 9 йилга узайди.
Миллий статистика қўмитаси маълумотларига кўра, 2025 йил якунлари бўйича Ўзбекистонда аҳолининг туғилиш вақтида кутилаётган ўртача умр кўриш давомийлиги 75,4 ёшни ташкил этди.
Статистик маълумотларга кўра, мазкур кўрсаткич мустақилликнинг илк йилларига нисбатан сезиларли даражада ошган. Хусусан, 1991 йилда ўртача умр кўриш давомийлиги 66,4 ёш бўлган бўлса, 1995 йилда 69,1 ёшга, 2000 йилда эса 70,8 ёшга етган.
Кейинги йилларда ҳам ижобий ўсиш давом этиб, 2005 йилда ушбу кўрсаткич 71,8 ёшни, 2010 йилда 73 ёшни, 2015 йилда эса 73,6 ёшни ташкил этган. 2020 йилда қисқа муддатли пасайиш кузатилиб, ўртача умр кўриш давомийлиги 73,4 ёшга тушган бўлсада, кейинги йилларда яна ўсиш қайд этилган.
Хусусан, 2024 йилда бу кўрсаткич 75,1 ёшни ташкил этган бўлса, 2025 йил якунларига кўра 75,4 ёшга етди.
Шундай қилиб, сўнгги 30 йилдан ортиқ давр мобайнида Ўзбекистонда ўртача умр кўриш давомийлиги қарийб 9 йилга ошган.
