АҚШда Жаҳон чемпионати ўйинидан кейинги тантаналар вақтида отишма юз берди
Мухлислар Кабо-Верденинг ЖЧдаги тарихий ғалабасини нишонлаётган бўлган. Отишма оқибатида 4 киши жароҳатланган.
АҚШнинг Массачусетс штати Броктон шаҳрида ФИФА Жаҳон чемпионати учрашувидан сўнг юз берган отишмада камида тўрт киши яраланди. Бу ҳақда NBC Boston хабар берди.
Броктон полицияси маълумотига кўра, ҳодиса маҳаллий вақт билан 27 июнь куни ярим тундан сал олдин Main Street ҳудудида содир бўлган. Ўша вақтда юзлаб одамлар кўчада тўпланган бўлиб, ҳуқуқ-тартибот идораларига бир неча марта ўқ узилгани ҳақида хабар келиб тушган.
Воқеа жойига етиб борган полиция Main Street ва Park Street чорраҳасида ўқотар қуролдан яраланган камида тўрт нафар кишини аниқлаган. Уларнинг барчаси шифохонага ётқизилган. Жабрланувчиларнинг аҳволи ҳақида ҳозирча маълумот берилмаган. Ҳодиса юзасидан ҳозирча ҳеч ким қўлга олинмаган.
Полиция оломон айнан қайси учрашув натижасини нишонлаётганига аниқлик киритмаган. Бироқ Броктон АҚШдаги энг йирик Кабо-Верде диаспораси яшайдиган шаҳарлардан бири ҳисобланади. Жума оқшомида маҳаллий аҳоли Кабо-Верде терма жамоасининг Жаҳон чемпионатида тарихий натижа қайд этганини нишонлаган.
Кабо-Верде Саудия Арабистони билан дуранг ўйнаб, Жаҳон чемпионати тарихида плей-офф босқичига чиққан энг кичик давлатга айланди. Африка ғарбий соҳиллари яқинидаги орол давлати мазкур турнирда илк бор иштирок этмоқда.
Маълумот ўрнида Кабо-Верде ва Саудия Арабистони ўртасидаги футбол баҳси Ҳуюстон стадионида бўлиб ўтган.
