Украина Россиянинг “Второво” нефть станциясига зарба берганини маълум қилди

Украина Хавфсизлик хизмати (СБУ) 27 июнь куни Владимир вилоятида жойлашган “Второво” нефть ҳайдаш станциясига Украина дронлари томонидан зарба берилганини маълум қилди. Бу ҳақда Meduza нашри хабар берди.

 

СБУ маълумотига кўра, бу июнь ойи давомида мазкур станцияга уюштирилган иккинчи ҳужум ҳисобланади. Дастлабки маълумотларга кўра, дронлар объектнинг техник биносига зарба берган ва шундан сўнг портлаш содир бўлган.

 

Шу билан бирга, Украина томони ҳужум содир бўлганини тасдиқловчи фото ёки видеоларни эълон қилмаган. Владимир вилояти расмийлари ҳам воқеа юзасидан ҳозирча расмий изоҳ бермаган.

 

НАСАнинг FIRMS сунъий йўлдош мониторинги тизими маълумотларига кўра, нефть ҳайдаш станцияси ҳудудида ёнғин қайд этилмаган. Бироқ тизим станциядан тахминан 10 километр узоқликда ёнғин содир бўлганини қайд этган.

 

“Второво” нефть ҳайдаш станцияси “Транснефт-Верхняя Волга” компаниясига тегишли. СБУ ушбу объектни енгил нефть маҳсулотларини экспорт портларига ҳамда ички истеъмолчиларга етказиб берувчи муҳим логистика маркази деб таърифлаган. Хусусан, мазкур станция орқали нефть маҳсулотлари Москвага ҳам юборилади.

 

Маълумотларга кўра, СБУ ушбу станцияга бундан аввал 10 июнь куни ҳам дронлар орқали ҳужум уюштирган.

 

Украина уруш давомида Россиянинг нефть инфратузилмаси объектларига мунтазам зарбалар бериб келмоқда. Нашр қайд этишича, бу ҳужумлар фонида Россиянинг айрим ҳудудларида ёқилғи тақчиллиги кузатилаётгани ва аҳоли томонидан бензин танқислиги юзасидан шикоятлар билдирилаётгани айтилмоқда.