Эстакададаги очиқ қисм нуқсон эмас — Тошкент метрополитени
Метрополитен Қўйлиқ–Роҳат оралиғидаги эстакада бўйича тарқалган видеоларга изоҳ берди.
Ижтимоий тармоқларда Тошкент метрополитенининг Ер усти ҳалқа йўли йўналишидаги Қўйлиқ ва Роҳат бекатлари оралиғида жойлашган эстакада конструкцияси хавфли ҳолатда экани ҳақида тарқалган видеолар юзасидан «Тошкент метрополитени» расмий муносабат билдирди.
Маълумотларга кўра, видеода акс этган очиқ қисм эстакада конструкциясидаги нуқсон ёки емирилиш эмас. Ушбу қисм лойиҳа асосида сигнал ва алоқа кабелларини ўтказиш учун махсус кўзда тутилган технологик ўтиш жойи ҳисобланади.
Қайд этилишича, мазкур конструктив ечим метро поездлари ҳаракати ёки эстакаданинг мустаҳкамлигига салбий таъсир кўрсатмайди. Шунингдек, йўловчилар хавфсизлигига ҳеч қандай таҳдид мавжуд эмас.
«Тошкент метрополитени» ижтимоий тармоқ фойдаланувчиларини тасдиқланмаган ва асоссиз маълумотларни тарқатмасликка чақирди. Таъкидланишича, ёлғон ёки тасдиқланмаган ахборотларни тарқатиш фуқаролар орасида асоссиз хавотир уйғотиши мумкин ҳамда бундай ҳолатлар учун амалдаги қонунчиликда жавобгарлик белгиланган.
