Қозоғистон ва Ўзбекистон чегарасидаги айрим назорат пунктлари 24 соат ишлайди
Чегарадан ўтиш тартиби соддалаштирилиб, ўтказувчанлик қуввати оширилади.
Қозоғистон ва Ўзбекистон ўртасидаги чегарани кесиб ўтиш тартиби янада соддалаштирилади. Бу борадаги тегишли келишувга киритилган ўзгартишлар Қозоғистон Мажлиси томонидан ратификация қилинди, деб хабар берди 24.kg.
Киритилган ўзгартишларга мувофиқ, икки давлат ўртасидаги айрим автомобиль чегара ўтказиш пунктлари икки томонлама мақомдан кўп томонлама мақомга ўтказилади. Шунингдек, мазкур назорат пунктлари энди фақат кундузги вақтда эмас, балки сутканинг 24 соати давомида фаолият юритади.
Қозоғистон транспорт вазири Нурлан Сауранбаевнинг таъкидлашича, ушбу янгилик чегара ўтказиш пунктларининг ўтказувчанлик қувватини ошириш, йўловчилар учун қулай шароит яратиш ҳамда икки мамлакат ўртасидаги туризм ва транзит юк ташувларини ривожлантиришга хизмат қилади.
Шунингдек, Транспорт вазирлиги мазкур ўзгаришларни амалга ошириш учун давлат бюджетида қўшимча маблағ ажратилиши талаб этилмаслигини маълум қилган.
