Сурхондарёда зиплайнда учаётган фуқаро аттракцион ўртасида осилиб қолди
Техник меъёрларга риоя қилинмагани сабаб фуқаро йўлнинг ўрта қисмида тўхтаб қолган.
Сурхондарё вилоятининг Бойсун туманида жойлашган зиплайн аттракционида фуқаро ҳаракат йўналишининг ўрта қисмида тўхтаб қолди. Ҳодиса оқибатида ҳеч ким жабрланмаган.
Саноат, радиация ва ядро хавфсизлиги қўмитаси маълум қилишича, воқеа 27 июнь куни соат 09:30 атрофида Бойсун туманидаги «Омонхона» маҳалласида жойлашган Xonjiza City МЧЖга қарашли зиплайнда содир бўлган.
Дастлабки ўрганишларга кўра, аттракцион техник жиҳатдан тўлиқ ишга туширилмаган, белгиланган тартибда давлат рўйхатидан ўтказилмаган ҳамда ундан фойдаланиш учун зарур рухсатнома олинмаган. Шунга қарамай, фуқаро ундан синов тариқасида фойдаланишга уринган.
Аниқланишича, зиплайннинг пўлат арқонлари техник меъёрларга мувофиқ етарли даражада таранг тортилмагани ва қиялик бурчаги талаб даражасида бўлмагани сабабли фуқаро йўлнинг ўрта қисмида тўхтаб қолган. Ташкилот ходимлари уни қисқа вақт ичида хавфсиз тарзда ерга туширишга муваффақ бўлган.
Ҳодиса оқибатида фуқаро тан жароҳати олмаган. Ҳолат юзасидан Саноат, радиация ва ядро хавфсизлиги қўмитаси томонидан ўрганиш ишлари олиб борилмоқда.
Қўмита эслатишича, аттракционларни давлат рўйхатидан ўтказмасдан ва тегишли рухсатномасиз фойдаланишга топшириш амалдаги қонунчиликка мувофиқ БҲМнинг 200 бараваригача, яъни 82,4 миллион сўмгача жарима қўлланилишига сабаб бўлиши мумкин.
