1 июлдан Ўзбекистонда касаллик нафақаларини тўлашнинг янги тартиби жорий этилади

2026 йил 1 июлдан Ўзбекистонда касаллик нафақаларини тўлашнинг янги тартиби жорий этилади. Эндиликда вақтинча меҳнатга лаёқатсизлик нафақалари дастлабки беш кун давомида иш берувчи, олтинчи кундан бошлаб эса Давлат ижтимоий суғурта жамғармаси маблағлари ҳисобидан молиялаштирилади. Бу ҳақда Ижтимоий ҳимоя миллий агентлиги ҳамда Ижтимоий суғурта жамғармаси томонидан ўтказилган брифингда маълум қилинди.

Таъкидланишича, янги тизим Президентнинг 2025 йил 3 ноябрдаги ПФ–206-сон Фармони асосида босқичма-босқич жорий этилаётган давлат ижтимоий суғуртаси тизимининг навбатдаги босқичи ҳисобланади.

Брифингда қайд этилишича, жорий йил бошидан ҳомиладорлик ва туғиш нафақаларини проактив тайинлаш тизими йўлга қўйилган. Шу мақсадда Ижтимоий суғурта ахборот модули ишга туширилиб, 10 та вазирлик ва идоранинг ахборот тизимлари ўзаро интеграция қилинган.

Натижада йилнинг дастлабки беш ойида 81 мингдан ортиқ меҳнатга лаёқатсизлик варақаси автоматик кўриб чиқилган. 58 минг ҳолатда қарийб 660 миллиард сўм миқдорида ҳомиладорлик ва туғиш нафақалари тайинланиб, тўлаб берилган.

Шунингдек, хусусий секторда ишлаётган аёлларга тўланган ҳомиладорлик ва туғиш нафақаси ҳажми ўтган йилга нисбатан сезиларли ошгани таъкидланди. Бир нафар аёлга тўланадиган ўртача нафақа миқдори 2,6 миллион сўмдан 14,8 миллион сўмгача кўпайган.

Янги тизимга кўра:

касалликнинг дастлабки 5 куни учун нафақани иш берувчи тўлайди;

6-кундан бошлаб тўловлар Давлат ижтимоий суғурта жамғармаси маблағлари ҳисобидан амалга оширилади;

6 ойдан 8 йилгача суғурта стажига эга фуқароларга ўртача иш ҳақининг 60 фоизи;

8 йилдан ортиқ стажга эга фуқароларга эса 80 фоизи миқдорида нафақа тўланади.

Бундан ташқари, I ва II гуруҳ ногиронлиги бўлган шахслар, 18 ёшгача тўрт ва ундан ортиқ фарзанди бор оилалар ҳамда ногиронлиги бўлган фарзандни тарбиялаётган оилалар учун нафақа миқдори яна 20 фоизга оширилади.