АҚШ Ўзбекистон халқаро аэропортларига замонавий портловчи моддаларни аниқлаш ускуналарини тақдим этди
Янги ускуналар Ўзбекистоннинг барча халқаро аэропортларида багаж, юк ва қўл юкларини текширишда қўлланилиб, авиация хавфсизлигини янада кучайтиради.
Ўзбекистон халқаро аэропортларида авиация хавфсизлигини янада кучайтириш мақсадида АҚШ ҳукумати томонидан замонавий портловчи моддаларни аниқлаш ускуналари беғараз асосда тақдим этилди. Бу ҳақда “Ўзбекистон аэропортлари” АЖ маълум қилди.
Қайд этилишича, АҚШнинг Экспорт назорати ва чегара хавфсизлиги (EXBS) дастури доирасида Ўзбекистонга 12 та LEIDOS русумидаги портловчи моддалар изларини аниқлаш қурилмаси топширилган. Мазкур ускуналар Ўзбекистондаги АҚШ элчихонаси ҳамда АҚШ Транспорт хавфсизлиги бошқармаси (ТSА) билан олиб борилган ҳамкорлик ва маслаҳатлашувлар натижасида тақдим этилган.
Янги ускуналар республиканинг барча халқаро аэропортларида юклар, почта жўнатмалари, рўйхатдан ўтказилган багаж ҳамда йўловчиларнинг қўл юкларини текшириш жараёнида портловчи моддалар изларини аниқлаш учун фойдаланилади.
“Ўзбекистон аэропортлари” АЖ маълумотига кўра, LEIDOS анализаторларининг жорий этилиши скрининг жараёнларини такомиллаштириш, авиация хавфсизлигини янада мустаҳкамлаш ҳамда мамлакат аэропортларининг халқаро авиация хавфсизлиги стандартлари ва тавсия этилган амалиётларга мувофиқлигини таъминлашга хизмат қилади.
“Ўзбекистон аэропортлари” АЖ раисининг авиация хавфсизлиги ва қўриқлаш режими бўйича ўринбосари Беҳзод Юсупов АҚШ билан йўлга қўйилган самарали ҳамкорлик замонавий технологияларни жорий этиш, авиация хавфсизлиги соҳасидаги мутахассисларнинг касбий салоҳиятини ошириш ва қўшма лойиҳаларни амалга оширишда муҳим аҳамият касб этаётганини таъкидлади.
Мазкур ускуналар АҚШ ҳукуматининг EXBS дастури доирасида бепул тақдим этилган бўлиб, ушбу дастур ҳамкор давлатларда экспорт назоратини такомиллаштириш, чегара хавфсизлигини мустаҳкамлаш ҳамда стратегик савдо бошқарувини ривожлантиришни қўллаб-қувватлайди.
Шунингдек, “Ўзбекистон аэропортлари” АЖ келгусида ҳам АҚШнинг тегишли идоралари билан ҳамкорликни кенгайтириш, тажриба алмашиш, авиация хавфсизлиги инфратузилмасини модернизация қилиш ва икки давлат ўртасидаги стратегик шерикликни янада ривожлантириш бўйича қўшма лойиҳаларни давом эттириш режалаштирилаётганини маълум қилди.
