Хоразмда фермер машинаси хатлангач, солиқ қарзини тўлади
Маълум бўлишича, фермер хўжалигида 180 млн сўм солиқ қарзи бўлган.
Мажбурий ижро бюроси Урганч тумани бўлими иш юритувидаги ижро ҳужжатларига асосан қарздор “Х.Ч.” фермер хўжалигидан жами 180,0 млн сўм солиқ ва бошқа турдаги қарзларини ундириш билан боғлиқ 9 та ижро ҳужжати бўйича олиб борилган ижро ҳаракатлари давомида қарздорга тегишли “Зил” ва “Class Oreon” русумли автотранспорт воситаларига нисбатан қидирув эълон қилинган.
Бошқарманинг қидирув шўъбаси томонидан олиб борилган қидирув ҳаракатлари натижасида мазкур автотранспорт воситалари топилиб, “Zil” русумли автотранспорт воситаси жарима майдончасига қўйилган.
Шунингдек, “Class Oreon” русумли автотранспорт воситаси топилиб хатлангандан сўнг, қарздор фермер хўжалиги раҳбари томонидан 120,0 млн сўм солиқ қарздорлиги тўлаб берилган.
Ҳозирда қолган ижро ҳужжатлари бўйича қолдиқ қарздорликни ундириш мақсадида қарздорга тегишли автотранспорт воситаларини реализация қилиш чоралари кўрилмоқда.
