Президент Шавкат Мирзиёев ХЖВ бошқарувчи директорининг ўринбосарини қабул қилди
Ўзбекистон Президенти Халқаро валюта жамғармаси билан шерикликни кенгайтириш муҳимлигини таъкидлади.
Ўзбекистон Республикаси Президенти Шавкат Мирзиёев 29 июнь куни Халқаро валюта жамғармаси “Швейсария гуруҳи”нинг навбатдаги йиғилишида иштирок этиш учун мамлакатга келган жамғарма бошқарувчи директорининг ўринбосари Бо Лини қабул қилди.
Учрашув аввалида Бо Ли давлат раҳбарига Халқаро валюта жамғармаси бошқарувчи директори Кристалина Георгиеванинг самимий саломи ва энг эзгу тилакларини етказди. Глобал молия бозорларининг бугунги ҳолати ва ривожланиш истиқболлари муҳокама қилинди.
Ушбу нуфузли халқаро институт билан амалий ҳамкорликни, энг аввало, ўтган йил сентабр ойида Ню-Ёрк шаҳрида Халқаро валюта жамғармаси раҳбари билан ўтказилган учрашувда эришилган келишувлар доирасида янада мустаҳкамлашнинг асосий жиҳатлари кўриб чиқилди.
Ўзбекистонда пул-кредит, валюта ва фискал сиёсатни такомиллаштириш каби йўналишларда амалга оширилаётган кенг кўламли ислоҳотларда жамғарма муҳим ўрин тутиши қайд этилди.
Макроиқтисодий сиёсат стратегияси ва рақамли тўловлар тизимини ривожлантириш, капитал ҳаракатини либераллаштириш, миллий статистика методологияси ва давлат даромадларини бошқаришни такомиллаштириш ҳамда эркин валюта айирбошлаш курсини қўллаб-қувватлаш масалаларида экспертлик ва техник кўмакни янада кенгайтириш зарурлиги таъкидланди.
Мамлакатнинг иқтисодий идоралари учун кадрлар тайёрлаш дастурларини ривожлантириш масаласига алоҳида эътибор қаратилди.
