Фарғонада Экология бўлими ходими 9500 доллар пора билан ушланди
Мансабдор дарахтлар кесилишига чора кўрмаслик эвазига пул талаб қилган.
Фарғона вилояти Бувайда туманида экология соҳасида коррупцияга оид ҳолат фош этилди. Тезкор тадбир давомида мансабдор шахс пора олаётган вақтида ашёвий далиллар билан қўлга олинди. Бу ҳақда вилоят Ички ишлар бошқармаси матбуот хизмати маълум қилди.
Дастлабки терговга қадар текширув материалларига кўра, туман экология бўлими ходими «Араб» маҳалласи ҳудудидаги 4 гектар ер майдонида жойлашган ёввойи дарахтларнинг кесилиши ҳамда ҳудуднинг қумдан тозаланишига нисбатан бир йил давомида чора кўрмаслик эвазига фуқародан 10 минг АҚШ доллари талаб қилган.
Вилоят ИИБ ҳамда бошқа ҳуқуқни муҳофаза қилувчи органлар ҳамкорлигида ўтказилган тезкор тадбирда порани олишда воситачилик қилган шахс ва мансабдор экология ходими 9 500 АҚШ доллари миқдоридаги пул маблағини олаётган вақтида ашёвий далиллар билан ушланган.
Шунингдек, воситачи бошқарувидаги автомашина кўздан кечирилганда, гиёҳвандлик воситасига ўхшаш моддалар аниқланиб, улар белгиланган тартибда далилий ашё сифатида расмийлаштирилган.
Мазкур ҳолат юзасидан Жиноят кодексининг 168-моддаси (фирибгарлик) ҳамда 211-моддаси билан боғлиқ ҳолатлар юзасидан жиноят иши қўзғатилиб, дастлабки тергов ҳаракатлари олиб борилмоқда.
